ҚазМұнайГаз көмірсутек қорын, өндіру, тасымалдау және сату көрсеткіштерін арттырды

Тәуелсіз аудиторлық бағалауға сай 2023 жылдың 31 желтоқсанында ҚМГ көмірсутектерінің дәлелденген және ықтимал қоры 733 млн тоннаға жетті. 2022 жылмен салыстырғанда қорлар деңгейі 3,7%-ға өсті.

Мұнай және газ конденсатын өндіру көлемі былтыр 23 млн 532 мың тоннаға жетті (6,9%-ға өсті). Ілеспе және табиғи газды өндіру көлемі (кері айдау көлеміне дейін) 14,8%-ға, яғни 9 млрд 460 млн текше метрге дейін ұлғайды.

Магистральды құбырлар мен теңіз арқылы мұнай тасымалдаудың жалпы көлемі 7,6%-ға, 80 млн 359 мың тоннаға дейін ұлғайды. Бұл ретте, магистральды құбырлар арқылы тасымалдау көлемі 6,5%-ға өсіп, 69 млн 581 мың тоннаға жетті. Мұнайды теңіз арқылы тасымалдаудың жалпы көлемі 15,4%-ға, яғни 10 млн 778 мың тоннаға дейін ұлғайды.

ҚМГ өндірген мұнай мен газ конденсатын сату көлемі 7,1%-ға артып, 23 млн 695 мың тоннаға жетті.